"आशिर्वाद या अभिशाप" @khulimuli sarika
"आशिर्वाद या अभिशाप"
कान्छा,
सुन्दैछु अचेल गाउँघर सहरबजार यत्रतत्र
डाक्टर कुटिने प्रचलन भित्रिएको छरे !
दिनैपिच्छे रेडियोमा आउने ती समाचार
अनि
दिनैपिच्छे पत्रपत्रिकामा छापिने
ती तोडफोड र स्वास्थ्यकर्मी माथिको अभद्र व्यवहार !
साच्चै,
मन सिरिङ्ग बनाउने गर्छन् यस्ता खबरले
अनि,
सोच्ने गर्छु
कान्छा, तिमी त सन्चै छौ नि ?
कान्छा,
तिमीले थाहा पायौ कि पाएनौ खै -
हिजो मात्र पल्ला घरे माइलाका
जेठा छोरा अस्पतालमा उपचार गर्ने क्रममै कुटिए रे ।
अनि
बिहान भर्खर तल्ला घरे जेठाका
कान्छी छोरीका कलेजमा तोडफोड भयो अरे ।
कान्छी भन्दै थिइन् रे-
"बा, यताको स्थिति त निकै नाजुक छ,
बाहिर निस्कन पनि मुस्किलै छ !"
मेरा कान्छा,
तिमी त आरामै छौ नि ?
कान्छा हेर त -
कुनै हाम्रा पाला थिए,
जहाँ डाक्टर भगवानरुपि मानिथ्यो
तर
आजकल
त्यो समय छ,
जहाँ उसलाई हत्याराको उपनाम दिइन्छ।
साच्चै कान्छा,
यहाँ त -
दृष्टिकोण नै कति परिवर्तन भएछ नि है ।
कान्छा,
तिमी त सुरक्षित छौ नि?
कान्छा,
मैले हरेक दसैंमा
डाक्टर बनेस् भनि दिएका आर्शिवाद
कतै तिम्रा लागी अभिशाप पो बन्ने हुन् कि?
डर लाग्दै छ मनको कुनामा,
कान्छा,
कतै मेरा आर्शिवाद-
तिम्रा निम्ति अभिशाप पो हुने हो कि ?
-खुलिमुली
(२०८०/०६/०९)
Credit : @khulimuli sarika
Photo - Social Media
Latest News
